ASÍ FOI A CELEBRACIÓN DO NADAL NA BIBLIOTECA

 

   O pasado 20 de decembro festexamos na biblio a fin dun longo primeiro trimestre e a chegada do Nadal. Non atopamos mellor xeito de facelo que coa entrega de premios do concurso "Decora a túa árbore" e a marabillosa actuación musical de dous dos nosos alumnos, Anabel Martínez de 2ºcurso de ciclo medio de Xestión Administrativa e Alexander Capone, de 3º da ESO. Ambos deleitáronnos cunhas panxoliñas, interpretadas por Alexander ao piano e Anabel á voz, e posteriormente Alexander agasallounos cunhas pezas ao acordeón. Un público entregado agasallounos a eles cunha multitude de aplausos, e a petición dalgún bis. Todo un éxito que esperamos que se repita na nosa biblioteca.

  A continuación demos paso á entrega de premios do concurso. Nesta ocasión os adornos premiados foron elaborados por tres rapazas, correspondendo o primeiro premio a Elena Torrado de 2º da ESO, o segundo premio a Antía Souto de 3º da ESO e o terceiro premio a Gabriela Blanco, tamén de 3º da ESO. Este ano cumpríase a segunda convocatoria deste concurso, e puidemos comprobar como vai subindo o nivel de elaboración, creatividade e orixinalidade na realización das propostas presentadas. Todos os adornos que foron achegados á convocatoria serviron para adornar a árbore que iluminou a entrada do instituto durante as festas.