ARTELLANDO na Biblio

  Un curso máis as lecturas realizadas nos clubs de lectura leváronnos, nesta ocasión, a camiñar por terras de Camariñas. Andrea Maceiras coa súa novela Volverás, golfiño achegounos a historia dos naufraxios na Costa da Morte e aló fomos coñecer o Cemiterio dos ingleses. Pola súa banda, Nerea Pallares levounos coa súa novela, Punto de araña , a múltiples espazos da costa camariñense: a praia do Trece, a praia de Reira ou o Cabo Vilán. Da man das súas protagonistas puidemos percibir a intensidade da paisaxe da Costa da Morte. Ademais,  para descubrinos moitos dos segredos desta terra, acompañounos Luis Giadás, quen nos ilustrou coa súa sabedoría sobre a historia dos naufraxios neste recuncho de Galicia. Velaquí o enlace ao vídeo deste marabilloso roteiro:  https://www.instagram.com/reel/DYfb5XPOgH1/?igsh=MTExMnJheXJjcXN1dQ==

 No marco da conmemoración das Letras Galegas deste ano 2026, o EDLG, en colaboración coa Biblioteca e a Comisión de Benestar e Convivencia ,decidiu levar a cabo diferentes accións no centro co obxectivo de exaltar e difundir a nosa lingua a través da creación literaria da escritora a quen dedicamos este ano as notas letras: Begoña Caamaño.  Con este obxectivo organizamos entre outras accións, o concurso "O reto das nosas letras. Os fíos que nos levan a Begoña: entre Esmelle e Ítaca".  Durante a semana do 11 ao 15 de maio lanzamos unha pregunta publicada nun panel na entrada do instituto, animando ao alumnado a resolver un reto ou a desenvolver unha creación gráfica ou literaria relacionada coa obra da autora.  Resolver un autodefinido, deseñar un panel informativo sobre Begoña Caamaño, crear unha pócima propia de Circe a partir dunha planta ou un logo personalizado que combinase a letra "M" de Morgana cun elemento da natureza foron as diferentes actividades propost...

 Hoxe a Praza do Recheo converteuse no corazón da improvisación e da cultura galega! ✨🎤 O noso IES tivo a honra de ser o centro anfitrión do II Encontro Bergantiñán e da II Liga Escolar da Regueifa, nunha xornada que reuniu arredor de 360 mozos e mozas de diferentes centros educativos da comarca. Ao longo do día, o alumnado participou en desafíos de regueifa, actividades de tradición oral, música e baile, compartindo talento, creatividade e convivencia arredor da lingua galega e das nosas raíces. 💙🤍 O encontro segue medrando ano tras ano, demostrando que a cultura galega tamén é presente e futuro para a mocidade. Ponteceso encheuse hoxe de versos improvisados, retranca, compañeirismo e moitas ganas de manter viva unha das tradicións máis nosas. 🌿🗣️ Parabéns a todo o alumnado participante, ao profesorado e ás persoas organizadoras por facer posible unha experiencia tan especial! 👏✨

  O pasado 23 de abril, coincidindo coa celebración do Día do Libro , Biblio A Ponte organizou unha actividade especial baixo o lema “Agasalla un préstamo!” , coa que se buscaba promover a lectura e dinamizar a participación da comunidade educativa. O alumnado foi convidado a realizar un préstamo na biblioteca e, como parte da proposta, recibir outro libro a modo de “agasallo lector”, favorecendo así a descuberta de novos títulos e xéneros. Ademais, animouse ao estudantado a crear un vídeo en formato mp4 no que compartisen unha recomendación lectora persoal, explicando por que ese libro merece ser lido e que lles aportou como lectores. Todos os vídeos enviados levaron premio!!! Participar nun roteiro literario por Camariñas , previsto para o 18 de maio, unha actividade cultural que reforza a conexión entre lectura, territorio e patrimonio. Con esta iniciativa, a biblioteca consolidou o seu papel como espazo dinamizador, creativo e aberto, fomentando o gusto pola lectura e a expres...

 Hoxe, 15 de abril, gozamos en Biblio A Ponte dun obradoiro de regueifa impartido pola regueifeira Lupe Blanco. A actividade d esenvolveuse na biblioteca escolar como unha experiencia creativa e participativa para o alumnado de 1º de ESO, enmarcada no programa Modelo Ponte… nas ondas! do que o noso centro forma parte. Durante a sesión, Lupe introduciu ao alumnado na tradición oral improvisada, explicando as súas claves expresivas, rítmicas e culturais, e guiounos na creación das súas propias estrofas, favorecendo a espontaneidade, o humor e o respecto pola palabra compartida. A biblioteca converteuse así nun espazo vivo de aprendizaxe, onde a oralidade, a música e a identidade cultural se entrelazaron, permitindo que o alumnado experimentase a regueifa non só como patrimonio, senón como ferramenta de comunicación e expresión persoal. A actividade reforzou o carácter inclusivo e dinamizador da biblioteca e contribuíu ao desenvolvemento das competencias comunicativas e culturais d...

  A semana anterior ás vacacións, o instituto celebrou a súa XXIV Semana Cultural , unha edición chea de actividades formativas e creativas nas que a Biblioteca tivo un papel fundamental, coordinando charlas, obradoiros e propostas participativas que contaron cunha excelente acollida por parte do alumnado. Entre as actividades máis destacadas estivo a charla da UDC “As redes sociais e os dereitos á intimidade” , impartida por María Esther Rovira para o alumnado de 2º de ESO . A sesión permitiu reflexionar sobre o uso responsable das redes, os riscos asociados á exposición dixital e a importancia de coñecer os dereitos de protección da intimidade nun mundo hiperconectado. Tamén da man da UDC, o alumnado de 3º de ESO asistiu á charla “Educar para a creatividade” , impartida por Vicente Castro Alonso , que tivo unha acollida especialmente boa. A actividade animou a pensar doutro modo, a experimentar e a entender a creatividade como unha ferramenta esencial para aprender, resolver p...

  O noso centro participou o día 25 de marzo, na I Liga Escolar de Debate , unha iniciativa organizada pola Consellería que busca fomentar o pensamento crítico, a expresión oral e o traballo en equipo entre o alumnado de secundaria. Para a primeira fase desta primeira edición, o tema proposto foi: “É conveniente limitar o uso das redes sociais aos menores de 16 anos?” , unha cuestión de plena actualidade que espertou interese e reflexión entre os participantes. O equipo de debate estivo formado por Luana Sueiro, Eva Rodríguez, Sofía de la Cruz, Uxía Antón, Sara Castro, Alba Torrado e Valeria Soage , alumnas de 3º e 4º da ESO , que prepararon argumentos, analizaron información e practicaron técnicas de oratoria ao longo das últimas semanas. A súa implicación, responsabilidade e capacidade para traballar de forma coordinada foron exemplares. Para participar na fase correspondente, desprazámonos ata o IES Eusebio da Guarda da Coruña , onde o noso equipo puido poñer en práctica todo o ...

 Para que estas vacacións sigades gozando coa lectura, aquí vos propoñemos unhas recomendacións do máis interesantes!!!!

  Co gallo da celebración do Día da Muller , o equipo de Biblioteca e o Departamento de Dinamización Lingüística puxo en marcha unha nova edición da nosa xa tradicional exposición fotográfica. Unha actividade que busca visibilizar e homenaxear figuras femininas relevantes da historia, da ciencia, das artes, do deporte ou de calquera outro ámbito significativo. A proposta consiste en que as mulleres do centro —docentes, persoal non docente e tamén as alumnas,— escollen a fotografía dunha muller que consideran inspiradora. Pode ser unha figura relacionada coa materia que imparten ou estudan, ou simplemente alguén cuxa traxectoria lles resulta significativa. A partir desa imaxe, cada participante realizou unha fotografía propia caracterizándose como a muller elixida , imitando na medida do posible a pose, a expresión e o estilo da foto orixinal. As imaxes están expostas no corredor de entrada do centro, acompañadas da fotografía orixinal e dunha breve biografía en galego da muller...

  Este curso conmemoramos o Día de Rosalía o máis preto posible da nosa autora.  O alumnado de 1º de Bacharelato desprazouse a Santiago para participar na celebración dos actos que a Fundación Rosalía de Castro organizou para ese día.  Acudimos á Praza de Vigo para presenciar a ofrenda floral á autora e o recital de versos de Rosalía de alumnado dos centros de primaria da cidade compostelana. A continuación, acompañados da Alborada cos Carapaus, desprazámonos ata o Panteón de Galegos Ilustres (San Domingos de Bonaval) onde participamos na lectura de poemas rosalianos e escoitamos a música dos Carapaus e Uxía & Javier Ruibal. Os nosos alumnos Loia Herforth e César Becerra representáronnos no acto coa lectura dos poemas: "Estranxeira na súa patria" e "Tecín soa a miña tea". 

Este curso o EDLG, en estreita colaboración coa Fundación Eduardo Pondal, decidimos conmemorar o Día da Lingua Materna coa realización de lecturas dramatizadas en galego por parte do alumnado do noso centro nos diferentes centros escolares do concello.  O alumnado de 1º e 3º da  ESO e do CM APSD partillou lecturas dramatizadas de contos como "A casa da mosca chosca", "As tres curuxiñas" e "A galiña roxa"  co alumnado de infantil e primaria do CRA Nosa señora do Faro, CEIP Eduardo Pondal, CEIP As Forcadas e a Galiña Azul. A contada da rapazada estivo acompañada da música e dos cantos da asociación musical Queixumes da Fundación Eduardo Pondal.  Deixámosvos unha mostra do que foi esta enriquecedora experiencia na que amosamos que a nosa ligua segue máis viva ca nunca:  https://www.instagram.com/reel/DU-ij5qjDBO/?igsh=cGZreHV5Nzc2OGJ6

  O alumnado de Oratoria de 3º de ESO, no día de onte, volveu demostrar o seu talento e compromiso coa comunicación oral no VIII Torneo de Debate Académico de Galicia , organizado pola Fundación Barrié na Coruña. Nesta cita, que reúne centros de toda Galicia e promove o pensamento crítico entre a mocidade, as nosas alumnas, Sara Rojo Gerpe, Alba Torrado Duarte, Uxía Antón Bellón, Sofía de la Cruz Oblanca, Gabriela Mata Vásquez e Valeria Soage Castro, defenderon con solvencia e madurez as súas posturas arredor dunha cuestión tan actual como complexa: S on necesarios os deberes escolares para aprender mellor? Ao longo dos dous debates realizados, amosaron unha preparación rigorosa, capacidade para argumentar con claridade e unha admirable habilidade para escoitar, responder e adaptar o discurso en tempo real. O debate converteuse así nun espazo de aprendizaxe viva, onde a palabra se transforma en ferramenta para analizar a realidade, contrastar ideas e construír coñecemento de maneir...

  O pasado 28 de xaneiro, a participación do alumnado de 1º de ESO na II Liga da Regueifa , celebrada en Ponte do Porto (Camariñas), converteuse nunha experiencia inesquecible e profundamente formativa. Xunto a outros institutos da contorna, o noso alumnado tivo a oportunidade de mergullarse nunha tradición viva, chea de ritmo, retranca e creatividade, guiados pola mestra da improvisación Lupe Blanco , que soubo espertar en cada participante o gusto pola palabra dita. A regueifa non é só un xogo verbal: é unha escola de pensamento rápido, de escoita activa e de comunicación eficaz. A través da improvisación, o alumnado aprende a organizar ideas ao instante, a expresarse con claridade e a manter un diálogo respectuoso e áxil. Estes encontros fortalecen a confianza, fomentan a creatividade e axudan a valorar a riqueza da nosa lingua e da nosa tradición oral. A súa participación nesta liga demostra que a oralidade segue a ser un espazo privilexiado para aprender, convivir e medrar. E ...

 Retomamos a actividade cultural no noso centro coa presenza de Carmen V. Valiña, investigadora e docente en cuestións de xénero e autora do ensaio As tolas que non o eran   da Editorial Galaxia. Carmen Valiña achegou ao alumnado de 1º e 2º de Bacharelato á investigación realizada sobre mulleres internadas no manicomio de Conxo, o maior do noroeste da Península Ibérica, entre 1885 e 1936, e á análise da psiquiatría como ferramenta de control social exercida sobre aquelas mulleres que non se axustaban aos modelos normativos da época.  Ademais un grupo de alumnas tiveron a oportunidade de entrevistar a autora na nosa radio nos momentos previos ao faladoiro.  Entrevista na radio

 BO NADAL!!! A postal gañadora do concurso deste ano foi a de Uxía Antón Bellón, que coa súa mensaxe vai representar ao centro nas felicitacións do Nadal!! Parabéns Uxía! Ademais contamos con outras moitas participacións, tanto alumnado de secundaria como ciclos. Grazas por colaborar coa biblioteca e parabéns polas vosas creacións!!!

 Iniciamos o mes de decembro e dende a biblioteca comezamos a argallar as actividades para o Nadal. As voluntarias xa se puxeron a traballar na decoración do espazo e tamén convocamos o noso tradicional concurso de postais de Nadal!!  Animádevos a participar e que sexa a vosa postal a imaxe representativa  do IES Eduardo Pondal para felicitar estas festas!!

 Coa fin de conmemorar o Día Internacional da Eliminación da Violencia contra a Muller, o Equipo de Biblioteca e Dinamización Lingüística organizaron varias actividades co alumnado da ESO durante as titorías do mes de novembro.  A visualización previa de contidos relacionados coa temática derivounos á creación en equipas de haikus sobre esa temática acompañados de ilustracións que representan ao haiku escrito. Finalmente, o alumnado voluntariado da biblioteca elaborou na aula de polos creativos pegatinas cos haikus creados que se repartiron o 25N nun posto ideado para tal fin no vestíbulo do centro.  Con esta actividade, xunto con outras que se están a desenvolver esta semana, queremos incidir un curso máis na necesidade de continuar na loita contra esta lacra que segue a estar presente na nosa sociedade.