ARTELLANDO na Biblio

 No día de onte tivo lugar unha charla informativa a todas as familias do centro que se animaron a pasar pola nosa biblioteca para coñecer os seus espazos e as actividades que poderán compartir coa rapazada en determinadas ocasións. Ademais salientamos as canles de información das que dispoñen e o uso do diferentes fondos e recursos que ofrece Biblio A Ponte. Grazas aos asistentes polo interese e a atención prestada!! Esperamos vervos pola biblio!!

O pasado vernes enchemos a biblioteca de novas propostas para as lecturas deste ano acompañadas dun bo chocolate e biscoito!! O alumnado manifestou os seus intereses e conformamos xa o novos clubs de lectura deste curso. Así haberá un total de seis clubs de lectura que traballarán con diferentes xéneros e temáticas. Teremos as reunións nos seguintes recreos: Luns: club de adultos e bachiller Mércores: club filosófico Xoves: club de 1º ESO Venres: clubs de 2º, 3º e 4º ESO

Iniciado o curso... imos dar comezo aos Clubs de Lectura!! Para iso, convocamos a todos os interesados a unha reunión, o próximo 18 de setembro durante o recreo , na biblioteca. Poñerémonos ao día dos intereses, as temáticas sobre as que nos gustaría ler e propostas de novos clubs. VÉMOMOS!!!

  Biblio A Ponte é un espazo vivo, en movemento constante, sobre todo nos recreos xa que se converte nun pequeno laboratorio onde a lectura, a creatividade e a convivencia fanse realidade. Pero para que todo isto funcione, precisamos das vosas mans, das vosas ideas e da vosa enerxía . Por iso lanzamos unha chamada clara ao alumnado: Anímate a formar parte do voluntariado da biblioteca!!! Durante os recreos, o voluntariado colabora en tarefas tan importantes como o préstamo de libros , a colocación e organización dos fondos , a preparación de actividades e exposicións ou a creación de materiais que dan vida ao espazo. Cada tarefa suma, cada idea conta, e cada voluntario fai que a biblioteca sexa un lugar mellor para todas e todos. Ser voluntario non é só colaborar: é aprender, compartir, participar e sentir que formas parte dun proxecto común. É descubrir como funciona unha biblioteca desde dentro, desenvolver habilidades de organización, comunicación e creatividade, e contribuír ...

  Biblio A Ponte abre de novo as súas portas cunha invitación clara: este é o teu espazo . Un lugar para descubrir, crear, compartir e participar activamente na vida cultural do centro. Queremos que cada membro da comunidade educativa —alumnado, profesorado e familias— dos recursos que ofrece a nosa biblioteca. Durante todo o curso, a biblioteca convértese nun punto de encontro onde a lectura, a creatividade e a convivencia se entrelazan. Os clubs de lectura ofrecen un espazo tranquilo para conversar sobre libros, descubrir novas voces literarias e gozar da lectura en compañía. Os recreos creativos transforman os tempos de recreo en momentos para aprender a coser, experimentar coa radio, crear, escribir, debuxar ou participar nos obradoiros de polos creativos. Todo isto fai da biblioteca un laboratorio de ideas. O voluntariado da biblioteca é outra das grandes fortalezas. O alumnado que forma parte del colabora na organización de actividades, na creación de materiais, na atenci...

 Chegado xa o mes de xuño e co traballo xa feito, desde  Biblio A Ponte queremos desexar a toda a comunidade educativa un bo verán, cheo de descanso e goce do bo tempo. Merecido o temos despois de vivir un ano tan intenso, con actividades, lecturas, xogos, roteiros, homenaxes... e un sinfín de dinámicas que se fixeron posible grazas á implicación do profesorado e, sobre todo, do alumnado... GRAZAS!!! Mais para non perder o costume no verán, aquí vos deixamos as derradeiras suxestións lectoras deste curso. Que as desfrutedes!!!!

  Un curso máis as lecturas realizadas nos clubs de lectura leváronnos, nesta ocasión, a camiñar por terras de Camariñas. Andrea Maceiras coa súa novela Volverás, golfiño achegounos a historia dos naufraxios na Costa da Morte e aló fomos coñecer o Cemiterio dos ingleses. Pola súa banda, Nerea Pallares levounos coa súa novela, Punto de araña , a múltiples espazos da costa camariñense: a praia do Trece, a praia de Reira ou o Cabo Vilán. Da man das súas protagonistas puidemos percibir a intensidade da paisaxe da Costa da Morte. Ademais,  para descubrinos moitos dos segredos desta terra, acompañounos Luis Giadás, quen nos ilustrou coa súa sabedoría sobre a historia dos naufraxios neste recuncho de Galicia. Velaquí o enlace ao vídeo deste marabilloso roteiro:  https://www.instagram.com/reel/DYfb5XPOgH1/?igsh=MTExMnJheXJjcXN1dQ==

 No marco da conmemoración das Letras Galegas deste ano 2026, o EDLG, en colaboración coa Biblioteca e a Comisión de Benestar e Convivencia ,decidiu levar a cabo diferentes accións no centro co obxectivo de exaltar e difundir a nosa lingua a través da creación literaria da escritora a quen dedicamos este ano as notas letras: Begoña Caamaño.  Con este obxectivo organizamos entre outras accións, o concurso "O reto das nosas letras. Os fíos que nos levan a Begoña: entre Esmelle e Ítaca".  Durante a semana do 11 ao 15 de maio lanzamos unha pregunta publicada nun panel na entrada do instituto, animando ao alumnado a resolver un reto ou a desenvolver unha creación gráfica ou literaria relacionada coa obra da autora.  Resolver un autodefinido, deseñar un panel informativo sobre Begoña Caamaño, crear unha pócima propia de Circe a partir dunha planta ou un logo personalizado que combinase a letra "M" de Morgana cun elemento da natureza foron as diferentes actividades propost...

 Hoxe a Praza do Recheo converteuse no corazón da improvisación e da cultura galega! ✨🎤 O noso IES tivo a honra de ser o centro anfitrión do II Encontro Bergantiñán e da II Liga Escolar da Regueifa, nunha xornada que reuniu arredor de 360 mozos e mozas de diferentes centros educativos da comarca. Ao longo do día, o alumnado participou en desafíos de regueifa, actividades de tradición oral, música e baile, compartindo talento, creatividade e convivencia arredor da lingua galega e das nosas raíces. 💙🤍 O encontro segue medrando ano tras ano, demostrando que a cultura galega tamén é presente e futuro para a mocidade. Ponteceso encheuse hoxe de versos improvisados, retranca, compañeirismo e moitas ganas de manter viva unha das tradicións máis nosas. 🌿🗣️ Parabéns a todo o alumnado participante, ao profesorado e ás persoas organizadoras por facer posible unha experiencia tan especial! 👏✨

 O alumnado de 3º da ESO tivo a oportunidade de realizar unha saída moi especial ás instalacións de La Voz de Galicia , onde puideron coñecer de primeira man como se crea un xornal: desde a primeira idea que xorde na redacción ata o momento no que as rotativas comezan a imprimir os milleiros de exemplares que chegan cada día aos quioscos. A visita comezou na sala de redacción , un espazo cheo de pantallas, movemento e voces que traballan ao ritmo da actualidade. Alí explicáronlles como se organiza o equipo xornalístico, como se seleccionan as noticias e cal é o proceso de verificación da información antes de que chegue ao público. O alumnado puido observar como se distribúen as seccións, como se redactan as pezas informativas e como se decide a estrutura da portada dun diario. A continuación, pasaron á área de maquetación e edición , onde descubriron o labor imprescindible dos equipos que dan forma visual ao xornal. Aprenderon como se combinan textos, fotografías e gráficos así co...

  O pasado 23 de abril, coincidindo coa celebración do Día do Libro , Biblio A Ponte organizou unha actividade especial baixo o lema “Agasalla un préstamo!” , coa que se buscaba promover a lectura e dinamizar a participación da comunidade educativa. O alumnado foi convidado a realizar un préstamo na biblioteca e, como parte da proposta, recibir outro libro a modo de “agasallo lector”, favorecendo así a descuberta de novos títulos e xéneros. Ademais, animouse ao estudantado a crear un vídeo en formato mp4 no que compartisen unha recomendación lectora persoal, explicando por que ese libro merece ser lido e que lles aportou como lectores. Todos os vídeos enviados levaron premio!!! Participar nun roteiro literario por Camariñas , previsto para o 18 de maio, unha actividade cultural que reforza a conexión entre lectura, territorio e patrimonio. Con esta iniciativa, a biblioteca consolidou o seu papel como espazo dinamizador, creativo e aberto, fomentando o gusto pola lectura e a expres...

 Hoxe, 15 de abril, gozamos en Biblio A Ponte dun obradoiro de regueifa impartido pola regueifeira Lupe Blanco. A actividade d esenvolveuse na biblioteca escolar como unha experiencia creativa e participativa para o alumnado de 1º de ESO, enmarcada no programa Modelo Ponte… nas ondas! do que o noso centro forma parte. Durante a sesión, Lupe introduciu ao alumnado na tradición oral improvisada, explicando as súas claves expresivas, rítmicas e culturais, e guiounos na creación das súas propias estrofas, favorecendo a espontaneidade, o humor e o respecto pola palabra compartida. A biblioteca converteuse así nun espazo vivo de aprendizaxe, onde a oralidade, a música e a identidade cultural se entrelazaron, permitindo que o alumnado experimentase a regueifa non só como patrimonio, senón como ferramenta de comunicación e expresión persoal. A actividade reforzou o carácter inclusivo e dinamizador da biblioteca e contribuíu ao desenvolvemento das competencias comunicativas e culturais d...

  A semana anterior ás vacacións, o instituto celebrou a súa XXIV Semana Cultural , unha edición chea de actividades formativas e creativas nas que a Biblioteca tivo un papel fundamental, coordinando charlas, obradoiros e propostas participativas que contaron cunha excelente acollida por parte do alumnado. Entre as actividades máis destacadas estivo a charla da UDC “As redes sociais e os dereitos á intimidade” , impartida por María Esther Rovira para o alumnado de 2º de ESO . A sesión permitiu reflexionar sobre o uso responsable das redes, os riscos asociados á exposición dixital e a importancia de coñecer os dereitos de protección da intimidade nun mundo hiperconectado. Tamén da man da UDC, o alumnado de 3º de ESO asistiu á charla “Educar para a creatividade” , impartida por Vicente Castro Alonso , que tivo unha acollida especialmente boa. A actividade animou a pensar doutro modo, a experimentar e a entender a creatividade como unha ferramenta esencial para aprender, resolver p...

  O noso centro participou o día 25 de marzo, na I Liga Escolar de Debate , unha iniciativa organizada pola Consellería que busca fomentar o pensamento crítico, a expresión oral e o traballo en equipo entre o alumnado de secundaria. Para a primeira fase desta primeira edición, o tema proposto foi: “É conveniente limitar o uso das redes sociais aos menores de 16 anos?” , unha cuestión de plena actualidade que espertou interese e reflexión entre os participantes. O equipo de debate estivo formado por Luana Sueiro, Eva Rodríguez, Sofía de la Cruz, Uxía Antón, Sara Castro, Alba Torrado e Valeria Soage , alumnas de 3º e 4º da ESO , que prepararon argumentos, analizaron información e practicaron técnicas de oratoria ao longo das últimas semanas. A súa implicación, responsabilidade e capacidade para traballar de forma coordinada foron exemplares. Para participar na fase correspondente, desprazámonos ata o IES Eusebio da Guarda da Coruña , onde o noso equipo puido poñer en práctica todo o ...

 Para que estas vacacións sigades gozando coa lectura, aquí vos propoñemos unhas recomendacións do máis interesantes!!!!

 No día de hoxe, o alumnado asistiu á charla “Revivindo a escritoras e artistas” , unha proposta da Universidade da Coruña centrada en recuperar e visibilizar creadoras que foron silenciadas ao longo da historia. A sesión permitiu descubrir escritoras e artistas pouco coñecidas, reflexionar sobre os motivos da súa invisibilización e comprender a importancia de revisar o canon cultural con perspectiva crítica. O alumnado participou activamente, facendo preguntas e conectando os contidos coa súa formación académica e coa igualdade de xénero.

  Co gallo da celebración do Día da Muller , o equipo de Biblioteca e o Departamento de Dinamización Lingüística puxo en marcha unha nova edición da nosa xa tradicional exposición fotográfica. Unha actividade que busca visibilizar e homenaxear figuras femininas relevantes da historia, da ciencia, das artes, do deporte ou de calquera outro ámbito significativo. A proposta consiste en que as mulleres do centro —docentes, persoal non docente e tamén as alumnas,— escollen a fotografía dunha muller que consideran inspiradora. Pode ser unha figura relacionada coa materia que imparten ou estudan, ou simplemente alguén cuxa traxectoria lles resulta significativa. A partir desa imaxe, cada participante realizou unha fotografía propia caracterizándose como a muller elixida , imitando na medida do posible a pose, a expresión e o estilo da foto orixinal. As imaxes están expostas no corredor de entrada do centro, acompañadas da fotografía orixinal e dunha breve biografía en galego da muller...

  Hoxe 5 de marzo, o alumnado de 2º de bacharelato  asistiu na biblioteca a unha charla da autora e ilustradora Cari Ca , quen presentou o seu libro Coralia e Maruxa , unha obra que recupera a verdadeira historia das irmás Fandiño, figuras emblemáticas de Santiago e símbolo de resistencia fronte á represión franquista. Durante o encontro, a autora explicou o proceso de investigación que a levou a reconstruír a vida de Coralia e Maruxa máis alá da imaxe popular coa que adoitan ser lembradas. Subliñou a importancia de devolverlles dignidade e visibilidade, e de comprender o contexto histórico que marcou as súas vidas. O alumnado participou activamente, formulando preguntas sobre memoria histórica, ilustración e divulgación cultural. A sesión converteuse nun espazo de reflexión sobre o papel da arte e da literatura na recuperación das historias silenciadas.

  Hoxe durante o recreo, volvemos realizar a actividade dos "Venres musicais" en Biblio A Ponte , na que participou o alumnado de 1º ESO deleitándonos con actuacións musicais variadas. Comezou Alejandro Varela Iglesias tocando dúas pezas de acordeón, seguido de Martina Novoa Varela e Lucía Rodríguez Castro cos ukeleles e máis as súas voces, acompañadas tamén pola voz de Naia Ferreiro Amado. Por último, Lucía Rodríguez tocou tamén o seu acordeón, poñéndolle fin a esta variada actuación. O público asistente aplaudiu con estusiasmo a música dos seus compañeiros e, sobre todo, a valentía de amosar os seus talentos a toda a comunidade educativa que se achegou ata Biblio A Ponte neste  no seu tempo de lecer. Parabéns aos artistas e grazas a todos os asistentes!!!