ARTELLANDO UN TEXTO TEATRAL
De certo que poucas veces imos ter a oportunidade de colaborarmos na creación unha peza de teatro. É por iso que a proposta que achegou Talía Teatro é tan gorentosa para nós. Están a facer un traballo de recollida de material para a creación dun novo espectáculo arredor da lingua e queren a nosa colaboración.
O que precisan de nós é se lles podemos achegar unha ou varias anécdotas, de distinta índole relacionadas co galego:
- anécdotas reais que che sucederon a ti ou a coñecidos,
- anécdotas de corte histórico
- lendas de corte popular
O motivo desta recompilación é a busca dunha pluralidade de informadores/as que permitan crear un collage sobre a situación da nosa lingua, actual pero tamén histórica.
Podes enviarlles un texto ao correo electrónico: info@taliateatro.gal indicando os seguintes datos:
Tipo de anécdota/ Ámbito xeográfico (se o hai)/ cóntanos a anécdota.
Que non che vén á cabeza ningunha historia: Eis un exemplo!
Un mozo dunha aldea galega emigrou a Castela e aos poucos meses regresou á súa terra. E nese breve tempo ocorrera algo asombroso: o rapaz esquecera a fala dos seus, a lingua que falara toda a vida. De volta na casa non facía senón preguntar:
-Mi padre: como se llama esto?
O pai, molesto ante ese fillo desleigado e farto de tanta pregunta parva, cando o mozo preguntou de novo ao atopar no chan da eira tan "exótica" ferramenta, "Mi padre: y esto como se llama?", respondeulle:
-Ponlle enriba o pé xa verás como cho di el mesmo.
O mozo pisou enriba dos dentes e o mango do pau ergueuse e bateu nos fociños do rapaz que recuperou coa mesma a memoria:
-Raio do angazo!
Comentarios
Publicar un comentario