READING IN THE TIME OF THE QUARANTINE


This blog's a bit deserted, innit? Supostamente, a pincelada anglosaxona do blog debería demorarse aínda uns días, pero penso que as circunstancias requiren un sopro de azos, por pequeno que sexa. É por isto que hoxe voume limitar a algunhas curiosidades que evoca a situación actual. Para alivio dalgún lector desprevido, hoxe aparcaremos a cerna en inglés da publicación en favor de algo máis cercano na nosa lingua.

O primeiro que espero é que vós e os vosos seres queridos esteades todos ben. Son tempos difíciles, é certo, mais unha simple ollada á nosa historia levaranos a concluír que a resistencia forma parte do ADN galego, co que o noso esforzo común faranos prevalecer, sen dúbida.

Dicía que son tempos difíciles, de confinamento. Parece nestes intres unha broma de mal gusto a típica pregunta de que libro levarías a unha illa deserta. Quen nos ía dicir que esa illa sería o noso fogar e teríamos que apañarnos co posto. De certa forma, Internet facilita o noso contacto co exterior. Porén, a reflexión que me interesa hoxe é doutro tipo, vira cara o interior e resulta se callar solitaria, xa que é unha reflexión lectora en tempos de corentena.

Penso noutros exemplos de épocas de reclusión como a que estamos a vivir e, a pesar dos numerosos episodios históricos entre os que poderíamos escoller, o primeiro no que caio é o da Gran Peste de Londres. Esta epidemia durou de 1665 a 1666 e, se ben as medidas de illamento non foron as mesmas, inspirou grandes obras literarias e outras casualidades, como a que poderedes descubrir neste artigo.

O testemuño de primeira man máis importante da época foi o diario de Samuel Pepys (ollo, pronunciado «pips», máis ou menos). Nos seus diarios, Pepys trasládanos a un momento histórico de tremenda importancia para unha Inglaterra que atravesaría, entre outros acontecimentos, o Grande Incendio de Londres ou a Segunda Guerra anglo-neerlandesa. Se xa este encerro é un bo momento para a lectura, revivir a experiencia de Pepys de seguro que nos fai compartir algo da súa flema inglesa ante a adversidade.

Outro texto interesante da época é o Diario do ano da peste, novela de Daniel Defoe, máis coñecido por ser o autor de Robinson Crusoe. Defoe quixo pasar este diario como unha reportaxe en primeira persoa, pese a ser un relato ficticio, aínda que moi ben documentado e, como lectura, forma un magnífico complemento aos diarios de Pepys.

Cambiando de tercio, e xa para rematar, escribo estas liñas despois de ler que o estado de alarma se prolongará dúas semanas. Ao saber da noticia, pensei no famoso stiff upper lip do que sempre falan os británicos xustificadamente, sobre todo se temos en conta a súa experiencia na Segunda Guerra Mundial, ese estoicismo que tanto nos axudará a sobrelevar estes días. Os meus titorandos de 2.º A recordarán o poema de W. D. Henley, Invictus, por termos falado do texto como un refuxio nos momentos en que somos postos a proba. Hoxe recordo uns versos do Ulysses de Tennyson que inclúo a continuación cunha pobre tradución dun servidor, cos que me despido.

Tho' much is taken, much abides; and tho'
We are not now that strength which in old days
Moved earth and heaven, that which we are, we are;
One equal temper of heroic hearts,
Made weak by time and fate, but strong in will
To strive, to seek, to find, and not to yield.

Pese a que moito nos arrebaten, moito ficará aínda;
e pese a non termos agora a forza que antano
movía ceo e terra, aquilo que fomos, seguimos a ser:
un mesmo alento de heroicos corazóns,
feble polo tempo e o fado, mais de vontade rexa
para loitar, buscar, achar e non rendernos.

Stay strong!!!








From left to right and top to bottom: title page of Defoe's original edition in 1722, portrait of Pepys painted by Sir Godfrey Kneller in 1689 and nine images of the Great Plague of London in 1665.

Comentarios

Publicacións populares

...PORQUE LAS ESTIRPES CONDENADAS A CIEN AÑOS DE SOLEDAD NO TENDRÍAN UNA SEGUNDA OPORTUNIDAD SOBRE LA TIERRA

EXTRAORDINARY WOMEN

CÓMIC INSPIRADO EN LA LEYENDA EL MONTE DE LAS ÁNIMAS DE GUSTAVO ADOLFO BÉCQUER

MAUS, A HISTORIA DISFRAZADA DE FÁBULA.

EUPHORIA, UNHA SERIE QUE MOSTRA O SUFRIMENTO DOS ADOLESCENTES

8 DE MARZO NO IES EDUARDO PONDAL DE PONTECESO

27 de marzo, Día Mundial do Teatro

ESOPÍAS?

O CASAMENTO DOS PAXARIÑOS: O DÍA DA MARMOTA GALEGO OU O DÍA DE SAN VALENTÍN?

POESÍA Y REDES SOCIALES