A FUNDACIÓN LUÍS SEOANE
Convidámosvos hoxe a visitar a Fundación Luís Seoane na Coruña. Unha visita indispensable coa que achegarse á obra e vida deste gran pintor; e tamén unha posibilidade de ver as exposicións temporais que o museo oferta.
A vida de Luís Seoane (Bos Aires 1910-A Coruña 1979) foi unha longa viaxe á través do século XX. Formado na época da dictadura de Primo de Rivera, loitador nos anos da República, fuxido en 1936, organizador e promotor da vida cultural no exilio, viaxeiro polo mundo e atento aos múltiples discuros que ía xerando a súa época, Seoane foi testemuña de excepción deste século axitado e convulso.
A súa obra, vasta e diversificada, o seu pensamento aberto, as súas iniciativas, convérteno nun personaxe destacado no panorama da cultura galega e española do século XX, que axudou a construir co seu esforzo, o seu talento e o seu compromiso.
A Fundación garda un valioso patrimonio dun dos grandes intelectuais galegos do século XX, seguramente o máis universal e o máis completo da nosa historia recente. Pero a intención non é únicamente a de conservar ese patrimonio senón o posibilitar un servicio primordial para a educación e a configuración da nosa identidade, buscando a visibilidade exterior dese legado e entendendo a colección como algo vivo, en constante crecemento, incorporando novas miradas sobre o legado físico e intelectual de Luís Seoane a partir de colaboracións de artistas de xeracións posteriores.
Comentarios
Publicar un comentario