Últimos folgos do trimestre para a Semana Cultural

 

A semana anterior ás vacacións, o instituto celebrou a súa XXIV Semana Cultural, unha edición chea de actividades formativas e creativas nas que a Biblioteca tivo un papel fundamental, coordinando charlas, obradoiros e propostas participativas que contaron cunha excelente acollida por parte do alumnado.

Entre as actividades máis destacadas estivo a charla da UDC “As redes sociais e os dereitos á intimidade”, impartida por María Esther Rovira para o alumnado de 2º de ESO. A sesión permitiu reflexionar sobre o uso responsable das redes, os riscos asociados á exposición dixital e a importancia de coñecer os dereitos de protección da intimidade nun mundo hiperconectado.

Tamén da man da UDC, o alumnado de 3º de ESO asistiu á charla “Educar para a creatividade”, impartida por Vicente Castro Alonso, que tivo unha acollida especialmente boa. A actividade animou a pensar doutro modo, a experimentar e a entender a creatividade como unha ferramenta esencial para aprender, resolver problemas e afrontar novos retos.

A Semana Cultural incluíu ademais dous obradoiros moi valorados polo alumnado máis novo. Por unha banda, o alumnado de 1º de ESO participou nun obradoiro de cestería impartido por Teresa Seara, no que puideron coñecer esta técnica tradicional e experimentar coa creación de pequenas pezas artesanais. Por outra banda, organizouse un obradoiro de costura creativa para elaborar chaveiros, que combinou aprendizaxe práctica, autonomía, paciencia e expresión persoal.

A participación completouse cun torneo de xadrez, no que alumnado de diferentes cursos puido poñer a proba a súa concentración, estratexia e capacidade de resolución de problemas. A actividade tivo unha magnífica acollida e converteuse nun espazo de convivencia no que se mesturaron competición saudable, respecto e interese polo xogo intelectual.

En conxunto, esta XXIV Semana Cultural destacou pola implicación do alumnado, pola variedade das propostas e pola aprendizaxe significativa que xerou. Un ano máis, a Biblioteca consolidouse como un motor de dinamización cultural dentro do centro, promovendo actividades que enriquecen a formación e alimentan a curiosidade e o espírito crítico.